’’زیر سایہ خورشید‘‘ قافلوں کے تحت ملک کے 600 شہروں کے لئے زیارت کا اہتمام

آستان نیوز کی رپورٹ کے مطابق؛ ڈاکٹر عبد الحمید طالبی نے عشرہ کرامت کی مناسبت سے مبارک باد پیش کرتے ہوئے ان بابرکت ایّام کو ولایت کے ساتھ گہرے تعلق کا بہترین موقع قرار دیتے ہوئے کہا کہ عشرہ کرامت ؛ پورے ملک میں حرم رضوی کے دائرے کو پھیلانے کا عشرہ ہے ، اس بارگاہ کے خادمین کا مختلف شہروں میں لوگوں کے درمیان ہونے سے اس سرزمین کا ہر ٹکڑا حضرت ثامن الحجج کا حرم لگنے لگتاہے  ۔ 
ایران کی سربلندی کے لئے امام کے ساتھ تجدید عہد
ڈاکٹر عبد الحمید طالبی نے زیارت کو اہم ثقافتی اقدام قرار دیتے ہوئے کہا کہ حضرت امام رضا(ع) کی زیارت ان قافلوں کی صورت میں پورے ملک میں وسیع پیمانے پر انجام پاتی ہے ،زیارت در حقیقت امام کے ساتھ تجدید عہد ہے تاکہ دلوں کو سکون ملے اور انسان کا پورا وجود امام (ع)   کے فرامین اور انقلاب کے بلند و بالا مقاصد کے حصول کے لئے منظم ہو جائے ۔ 
انہوں نے کہا کہ یقیناً اس سال کی زیارت پچھلے برسوں سے مختلف ہے کیونکہ آج تمام لوگ امام رضا(ع) کے ایران کی کامیابی اور سربلندی کے لئے اہلبیت(ع) کے دامن سے متوسل ہیں۔ 
عوامی اجتماعات میں شرکت اور خدمت و سلامتی  کے علمبرداروں کی تعظیم و تکریم
ڈاکٹر طالبی نے رواں سال بھیجے جانے والے قافلوں کی ترجیحی ذمہ داریوں کو بیان کرتے ہوئے کہا کہ ’’زیر سایہ خورشید‘‘ قافلوں کی رواں سال میں زیادہ توجہ رات کے اجتماعات میں شرکت اور شہداء کے معزز خاندانوں اور عوامی کارکنان سے ملاقات پر مرکوز ہے ۔ 
انہوں نے کہا کہ تمام خدمت گزاروں بشمول طبی عملے، فائر برگیڈذ،ہلال احمر،میونسپلٹی کے ملازمین اور شہری سلامتی کے محافظوں اور اس سرزمین کے بہادر سپوتوں اور سپاہیوں کی تکریم و تجلیل بھی ان پروگراموں کی اولین ترجیحات میں شامل ہے ۔
قابل ذکر ہے کہ یہ منظم حرکت آستان قدس رضوی کے یوتھ انسٹیٹیوٹ کی کاوشوں اور حرم امام رضا(ع) کی اعلیٰ انتظامیہ کے تعاون سے چلائی جا رہی ہے اور 65 قافلوں کے تحت 600 شہروں اور 700 دیہاتوں میں خدام  تشریف لے جائیں گے۔