شب ولادت امام زمانہ(عج) حضرت حجت بن الحسن العسکری(ع) کی مناسبت سے اردو زبان خواتین کے لئے جشن کا انعقاد

آستان نیوز کی رپورٹ کے مطابق؛ رسول خدا کے بارہویں جانشین اور حق کی آخری آیت حضرت امام مہدی صاحب الزمانؑ(عج) کی شب ولادت با سعادت کے موقع پر حرم امام رضا علیہ السلام کے ادارہ غیرملکی زائرین کے شعبہ برصغیر پاک و ہند کی کاوشوں سے حرم امام رضا(ع) کے رواق غدیر میں پاکستان اور ہندوستان کی اردو زبان خواتین کے لئے خصوصی جشن منعقد کیا گیا۔ 
جشن کے آغاز میں ’’خورشید ہشتم ‘‘ گروپ نے مل کر قرآن کریم کی چند ایک آیات کی تلاوت کی  جس کے بعد    محترمہ جعفری نے خوبصورت انداز میں منقبت خوانی کی اور پروگرام کو جاری رکھتے ہوئے ’’دختران طوبیٰ‘‘ گروپ نے قصیدے اور منقبتیں پڑھیں۔ 
امام زمانہ(عج) کی ولادت کی مناسبت سے منعقد ہونے والے اس جشن میں اسلامک اسکالر محترمہ طلعت بتول نے خطاب کیا اور کہا کہ غیبت امام زمانہ(عج) کا دور جتنا زیادہ گزرتا جارہا ہے منتظرین اور مولا کے اعوان و انصار کے مدّ مقابل  بہت سارے فتنے رونما ہورہے ہیں۔ 
انہوں نے کہا کہ امام کے حقیقی مددگار اور اعوان انصاروہ افراد ہیں جو قرآن کی سورہ قصص کی آیت نمبر پانچ«وَ نُرِیدُ أَنْ نَمُنَّ عَلَى الَّذِینَ اسْتُضْعِفُوا فِی الْأَرْضِ وَ نَجْعَلَهُمْ أَئِمَّةً وَ نَجْعَلَهُمُ الْوارِثِینَ» کے مطابق یقین رکھتے ہیں ،اوراس کائنات کے نجات دہندہ کو جس کے بارے میں بہت سارے توحیدی اور غیر توحیدی ادیان کا عقیدہ ہے رسول خدا(ص) کا فرزند اور حضرت فاطمہ زہراء(س) کی نسل سے حضرت امام مہدی (عج) کو جانتے ہیں۔ 
محترمہ طلعت بتول نے کہا کے امام زمانہ(عج) کے مددگار وہ ہیں جو حضرت حجت ابن الحسن العسکری(ع) کی نسبت ہر روز اپنی معرفت و شناخت کو بڑھاتے ہیں کیونکہ آئمہ معصومین علیہم السلام کی ڈھائی سو سالہ زندگی اور غیبت کبریٰ کا زمانہ ایک اہم تجربہ ہے جو ہمارے لئے راستے کا چراغ ثابت ہوسکتا ہے ۔ 
واضح رہے کہ جشن کی اس تقریب کے دوران شرکا اور حاضرین محفل کو حرم امام رضا(ع) کی جانب سے نفیس اور قیمتی تبرکات اور انعامات سے بھی نوازا گیا۔