شیخ صدوق(رح) کی عظیم الشان تصنیف کا از سر نو جائزہ اور منتخب احادیث کی اشاعت

آستان نیوز کی رپورٹ کے مطابق؛ کتاب کی تقریب رونمائی کے دوران آستان قدس رضوی کی اسلامک ریسرچ فاؤنڈیشن کے سربراہ ڈاکٹر احد فرامرز قراملکی نے اس قیمتی اثر کی علمی و معنوی قدر و قیمت کی وضاحت کرتے ہوئے کہا کہ یہ کتاب ’’عیون اخبار الرضا(ع)‘‘ سے لی گئی ہے ،اس کتاب کے مصنف شیخ صدوق(رح) ہیں جنہوں نے معتبر اسناد کی تلاش ،متعدد سفراور روایات کے انتہائي دقت اور باریک بینی پرمبنی انتخاب سے اسے مرتب کیا۔ 
جناب قرا ملکی کے مطابق’’عیون اخبار الرضا(ع)‘‘ ایک جامع اور کثیر الجہتی اثر ہے جس میں امام رضا(ع) کی حیات طیبہ،توحید مباحث، امامت،عقائد، فقہ، اخلاقی مسائل ، تاریخی واقعات اور امام ہشتم کے روضہ منورہ سے منقول کرامت جیسے مختلف موضوعات شامل ہیں ۔ 
انہوں ںے بتایا کہ یہ منتخب کتاب تیار کرنے کا کام آستان قدس رضوی کے متولی کی درخواست پر کیا گیا جس میں روایات کا انتخاب حجت الاسلام والمسلمین محمد حکیمی سے کروایا گیا ہے جو ایک ممتازمحدث، محقق اور عظیم مجموعے’’الحیات‘‘ کے مصنفین میں سے ہیں، 
جناب قرا ملکی  نے کہا کہ اس اثر کا ترجمہ جناب حمید رضا شیخی نےکیا ہےجو ایک ممتاز اور با صلاحیت مترجم ہیں ،یہ مترجم حرم امام رضا(ع) میں ’’مفاتیح الجنان‘‘ کے ترجمے سمیت متعدد تراجم انجام دے چکے ہیں۔ 
انہوں نے بتایا کہ متعدد ممتاز محدثین اور رجالی محققین نے جن میں آیت اللہ العظمیٰ شبیری زنجانی کے فرزند سید محمد جواد شبیری شامل ہیں اس کتاب کی نظرثانی  کی کی ہے اور ڈاکٹر محمود ملکی نے بطور حدیث شناس اس اثر کی علمی نظارت  میں اہم کردار ادا کیا ہے ۔ 
اس کتاب کا شائع شدہ نسخہ دو صفحاتی ڈیزائن کےساتھ پیش کیا گیا ہے جس کے ایک صفحے پر عربی متن اور دوسرے صفحے پر فارسی ترجمہ ہے تاکہ حرم امام رضا(ع) کے زائرین بھی آسانی سے مطالعہ کر سکیں۔ 
عام افراد کے لئے رضوی احادیث کا انتخاب
ڈاکٹر محمود ملکی نے منتخب عیون اخبار الرضا(ع) کے بارے میں وضاحت کرتے ہوئے کہا کہ اس اثر میں 960 روایات شامل ہیں جن میں امام رضا(ع) سے منقول یا ان کے بارے میں تاریخی اخبار و احادیث شامل ہیں، روایت کے انتخاب میں کوشش کی گئی ہے کہ ایسی روایات کا انتخاب کیا جائے جو زائرین و مجاورین کے لئے مفید ہوں۔