عید غدیر کی مناسبت سے حرم امام رضا(ع) میں اردو زبان زائرین کے لئے جشن کا انعقاد

جناب مہدی لسانی نے آستان نیوز سے گفتگو کرتے ہوئے عید امامت و ولایت کی آمد پر مبارک باد پیش کی اور کہا کہ اس عظیم عید کے موقع پر حرم امام رضا(ع) میں اردو زبان زائرین کے لئے محفل جشن کا انعقاد کیا گیا ہے ۔ 
انہوں نے بتایا کہ جشن کا یہ پروگرام شب عید غدیر حرم امام رضا(ع) کے رواق غدیر میں منعقد کیا گیا جس میں پاکستانی اور ہندوستانی زائرین کی کثیر تعداد نے شرکت کی۔ 
انہوں نے کہا کہ جشن کا آغاز زیارت آمین اللہ سے ہوا جس کے بعد’’خورشید ہشتم گروپ‘‘ نے منقبت خوانی کی۔ 
جشن کے پروگرام کو جاری رکھتے ہوئے حرم امام رضا(ع) کے اردو زبان خطیب حجت الاسلام سید مرتضیٰ حسین نقوی نے عید امامت و ولایت یعنی عید غدیر کے منانے کی اہمیت پر خطاب کیا۔ 
پروگرام کے اختتام پر امیرالمؤمنین حضرت علی علیہ السلام کی مدح میں جناب عارف حسین زاہدی نے منقبت خوانی کی ۔
جناب لسانی نے کہا کہ امید کرتے ہیں کہ ان پروگراموں کے انعقاد سے غیرملکی زائرین میں عید غدیر کی اہمیت اور اہلبیت(ع) کی تعلیمات کو اجاگر کرسکیں۔