حضرت امام محمد تقی (ع) کی ولادت کی مناسبت سے روضہ منورہ امام رضا(ع) پر پھول نچھاورکئے گئے

آستان نیوز کی رپورٹ کے مطابق؛ ابن الرضا(ع) حضرت امام محمد تقی الجواد علیہ السلام کی شب ولادت با سعادت کے موقع پر حرم امام رضا(ع) میں خوشیوں کا سماں اور عقیدت و معنویت سے سرشار تھا ،شدید ٹھنڈ اور سردی کے باوجود زائرین و مجاورین نے پھول نچھاور کرنے کی اس تقریب میں نہایت گرم جوشی اور عشق و عقیدت کے ساتھ شرکت فرمائی۔ 
اس نورانی اور بابرکت شب میں ایسے لگتا تھا جیسے آسمان بھی امام تقی(ع) کی آمد کی خوشی میں پھول برسا رہا ہے خاندان عصمت و طہارت کے چاہنے والوں کے ہاتھوں میں رنگ برنگے اور خوشبو دار پھول لئے اور زبان پر خوشی کے نغمے جاری کرتے ہوئے شہداء چوک سے حرم امام رضا(ع) تک پیدل چل کر آئے ۔ 
  اہلبیت(ع) کے چاہنے والوں کے اس ہجوم کے سامنے بہت بڑے بڑے رنگ برنگے پرچم اور بنرز جو’’یا جواد الائمہ(ع)‘‘ اور ’’یا امام رضا(ع)‘‘ کے مبارک نام سے مزیّن تھے ۔
ایمان و محبت سے لبریز یہ کاروانِ عشق آہستہ آہستہ قدم بڑھاتے ہوئے حرم تک پہنچا ،زبانوں پر ’’جواد الائمہ آمد، خوش آمد، خوش آمد‘‘ اور ’’یا جوادالائمہ گل زھرا‘‘ کا ذکر تھا اور مسرت کے ان لمحات میں حرم میں پہنچ کر امام رضا(ع) کو ان کے اکلوتے فرزند حضرت امام محمد تقی الجواد علیہ السلام کی آمد کی مبارک باد پیش کی اور مولا سے اپنے اپنے لئے عیدی طلب کی۔