’’حرم کا حسینیہ‘‘ ایران اور عالم اسلام کی عزاداری کے ورثے کے تحفظ کی ایک کاوش

جناب سیدمہدی سجادی زادہ ’’حسینیہ حرم‘‘ پروگرام منعقد کراوانے کے ذمہ دار ہیں انہوں نے آستان نیوز کے نمائندے کو بتایا کہ گذشتہ کئی برسوں سے روایتی عزاداری کو زندہ کرنے اور فروغ دینے کے لئے کوشش کی جا رہی تھی،ایران میں بہت سارے قبائل مختلف انداز میں عزاداری کرتے ہیں مثال کے طور پرصوبہ خوزستان اور بوشہر میں ہم نے جو ماتمی دستے دیکھے ہیں ان کی عزاداری کا طریقہ کسی دوسری جگہ نہیں ملتا۔ 
روایتی عزاداری کے ورثے کی نجات اور حرم میں منعقدہ عزاداری میں عوامی شمولیت
انہوں نے اس بات پر زور دیا کہ ’’حسینیہ حرم‘‘ روایتی عزاداری کو بچانے کی کوشش کر رہا ہے اس لئے ہمارے بنیادی افراد وہ عزادارہیں جو مختلف صوبوں اور قبائل سے تعلق رکھتے ہیں اور اب روایتی طریقے سے عزاداری کا انعقاد کرتے ہیں اور عزاداری کے اس روایتی انداز کے تحفظ میں دلچسپی رکھتے ہیں۔ 
واضح رہے کہ عزاداری کے لئے ان ماتمی دستوں اور عزاداروں کو مخصوص طریقہ کار کے ساتھ دعوت دی جاتی ہے ۔ 
مختلف اداروں کا تعاون اور بائیس صوبوں کی شرکت
جناب سجادی زادہ نے بتایا کہ حرم امام رضا(ع) کے ساتھ ساتھ مختلف ادارے جن میں ادارہ تبلیغات اسلامی،بسیج،رضوی خدمت کے مراکز، مذہبی انجمنوں کی کونسل،ذاکرین کے مراکز، عوامی اور جہادی گروپ وغیرہ اس پروگرام کے انعقاد میں تعاون کرتے ہیں۔ 
انہوں نے بتایا کہ 2020 سے حسینیہ حرم پروگرام کا آغاز کیا گیا جس کے پہلے سال میں فقط ایک صوبے نے شرکت کی اور رفتہ رفتہ آج اس کا دائرہ بائیس صوبوں تک پہنچ گیا ہے ۔ 
انہوں نے مزید یہ بتایا کہ ایران کے علاوہ پاکستان، ہندوستان ، افغانستان اور عراق جیسے ممالک سمیت انگریزی بولنے والے ممالک کے ماتمی دستے بھی اس پروگرام میں شرکت کرتے ہیں اور امید ہے کہ اس سال شام اور بحرین سے بھی ماتمی دستے حسینیہ حرم کے پروگرام میں شرکت کریں گے۔ 
’’حسینیہ حرم ‘‘ پروگرام میں میڈیا کوریج اور غیرملکی زائرین کی شرکت
جناب سجادی زادہ نے حسینیہ حرم پروگرام کی میڈیا کوریج کے بارے میں گفتگو کرتے ہوئے کہا کہ صوبائی پروگراموں کو عام طور پر براہ راست نشرکیا جاتاہے اور مختلف چینلز جیسے چینل ون، ٹو، تھری، قرآن، افق اور دیگر چینلز سے براہ راست، ریکارڈ شدہ یا خلاصے اور رپورٹ کی شکل میں نشر کیا جاتا ہے۔
اس پروگرام میں غیر ایرانی زائرین کی شرکت کے بارے میں انہوں نے کہا کہ شرکاء کا ایک حصہ بیرون ملک سے مشہد مقدس میں حاضر ہوتا ہے اور دوسرا حصہ حرم میں موجود غیر ملکی زائرین میں سے یا یہاں مقیم افراد میں سے منتخب کیا جاتا ہے اور گروپوں کے ساتھ شامل ہو جاتا ہے۔
آخر میں انہوں نے سید الشہداء کی عزاداری کی مجالس میں امام رضا(ع) کے مقام و مرتبہ پر روشنی ڈالتے ہوئے کہا کہ ہم امام رضا(ع) کو عزادری کی مجالس میں بانی سمجھتے ہیں ، اور اس پروگرام کا انعقاد صوبوں، قبائل اور قومیتوں کی طرف سے امام رضا (ع) کی بارگاہ میں خراج عقیدت اور تعزیت پیش کرنے کی ایک شکل سمجھتے ہیں۔