حرم امام رضا(ع) میں شب عاشورا کے موقع پرمنعقدہ خطبہ خوانی کی تاریخی روایتی رسم کے متن میں تبدیلی 

آستان نیوز کی رپورٹ کے مطابق؛ حرم امام رضا(ع) کے اماکن متبرکہ کے سربراہ جناب امین بہنام نے کہا کہ ہر سال شب عاشورا میں خطبہ خوانی کی روایتی رسم حرم رضوی کے خدام کی موجودگی میں منعقد کی جاتی ہے اس سال بھی یہ روایتی اور تاریخی رسم اسی ترتیب کے ساتھ منعقد ہوئی فقط خطبہ خوانی کے متن میں کچھ تبدیلی انجام دی گئی ۔ 
انہوں نے خطبے کے متن میں کی گئی تبدیلیوں کا ذکر کرتے ہوئے کہا کہ رہبر شہید انقلاب اسلامی حضرت آیت اللہ سید علی خامنہ ای(رح) کی شہادت کے پیش نظر خطبے کے متن میں اسلامی جمہوریہ ایران کے بانی حضرت امام خمینی(رح) کے نام اور یاد کے ساتھ ساتھ ان کی مغفرت کی دعا اور رہبر معظم انقلاب حضرت آیت اللہ سید مجتبیٰ حسینی خامنہ ای کی صحت و سلامتی اور طول عمر کے لئے بھی دعا کی جائے گی۔ 
انہوں نے بتایا کہ چونکہ ماضی میں خطبے کا متن زیادہ تر عربی زبان میں پڑھا جاتا تھا، اس لیے نئے متن میں رسم خطبہ خوانی کی شان اور روحانی مواد کو برقرار رکھتے ہوئے، عبارات کو رواں اور قابلِ فہم بنانے کی کوشش کی گئی ہے اور کچھ حصے فارسی زبان میں پیش کیے جائیں گے تاکہ زائرین اور سامعین اس کے مفاہیم سے زیادہ  آشنا ہوسکیں ۔
حرم امام رضا(ع) کے اماکن متبرکہ کے سربراہ نے بتایا کہ شب عاشورا کے خطبے کے نئے متن میں ایسی دعاؤں اور مضامین کا استعمال کیا گیا ہے جو عام لوگوں کے لیے زیادہ مانوس اور آشنا ہیں اور یہ تبدیلیاں آستان قدس رضوی کے محترم متولی کے ابلاغی خطوط کے مطابق کی گئی ہیں۔ 
انہوں نے کہا کہ خطبہ خوانی کی اس رسم میں شمع گردانی کی رسم کے اختتام کے بعد، خطبہ خوان آستان قدس رضوی کے محترم متولی سے اجازت لے کر اپنی جگہ پر جاتے ہیں اور ایک خطبہ پیش کرتے ہیں جس میں اللہ تعالیٰ کی حمد و ثنا، پیغمبر اکرم (ص) اور اہل بیت عصمت و طہارت (ع) پر درود، حضرت ولی عصر (عج) کے ظہور میں تعجیل کے لیے دعا، نیز اسلامی جمہوریہ ایران کے بانی امام خمینی (رح) اور رہبرشہید انقلاب اسلامی حضرت آیت اللہ خامنہ ای (رح) کے لیے مغفرت، اور رہبر معظم انقلاب حضرت آیت اللہ سید مجتبیٰ حسینی خامنہ ای کی صحت و کامیابی کے لیے دعا شامل ہوتی ہے۔ 
حرم امام رضا(ع) کے ادارہ اماکن متبرکہ کے سربراہ نے بتایا کہ اس رسم کے کے دوران ، تقریر کے بعد، مصائب اہل بیت خوانی اور مرثیہ  خوانی کی جاتی ہے اور پھر شمع گردانی اور آخر میں خطبہ خوانی انجام دی جاتی ہے۔
واضح رہے کہ شب شہادت امام رضا(ع) اور شب شہادت امام حسین(ع) کےموقع پر خطبہ خوانی کی اس روایتی رسم کا آغاز صفوی دور سے ہوا جسے اسلامی انقلاب کی کامیابی کے بعد مزید شاندار طریقے سے منعقد کیا جارہا ہے ۔