پاکستان کے مشہور خطیب نے اپنے ملک کے شیعہ شہداء کی تاریخ پر مشتمل  کتب کا مجموعہ حرم امام رضا(ع) کی لائبریری کو عطیہ کیا

آستان نیوز کی رپورٹ کے مطابق؛ مؤرخہ 5نومبر2026 بروز جمعرات کو حرم امام رضا(ع) کی مرکزی لائبریری میں واقع دفتر میں کتابوں کا مجموعہ عطیہ کرنے کی تقریب کا انعقاد کیا گیا جس میں آرگنائزیشن آف لائبریریز،میوزیمز اور آستان قدس رضوی کے دستاویزاتی مرکز کے سربراہ حجت الاسلام والمسلمین سید جلال حسینی،حرم امام رضا(ع) کے ادارہ غیرملکی زائرین کے ڈائریکٹر جناب مہدی لسانی اور کتاب کے مصنف حجت الاسلام والمسلمین سید شہنشاہ حسین نقوی سمیت حرم کے چند ایک دیگر ذمہ داران نے شرکت فرمائی۔ 
کتاب کے مصنف حجت الاسلام والمسلمین سید شہنشاہ حسین نقوی نے تفصیلات بتاتے ہوئے کہا کہ پاکستان کے شیعہ شہداء (سال 1947ء سے تاحال) کے تعارف کے محور پر مشتمل «مقاتلِ شیعہ» کا یہ مجموعہ اردو زبان میں تقریباً 20 جلدوں پر مشتمل ہے، جن میں سے اس وقت 14 جلدیں شائع ہو چکی ہیں۔
اس پاکستانی شیعہ عالم دین نے مزید یہ کہا کہ اس اثر کی تدوین کا مقصد پاکستان کی شیعہ تاریخ کا تحفظ اور آئندہ نسلوں کو ان شہداء سے روشناس کرانا ہے۔ دراصل اس مجموعے کی تالیف کے ذریعے یہ کوشش کی گئی ہے کہ آنے والی نسلیں یہ جان سکیں کہ اس ملک کے لوگوں نے اہل بیت (ع) کی محبت کے جرم میں کیا کیا مشکلات جھیلی ہیں اور اس راستے میں کیا کیا قربانیاں دی ہیں؛ کیونکہ پاکستان کے شیعہ مسلمانوں کی اہل بیت (ع) کے ساتھ محبت و وابستگی اتنی آسانی سے حاصل نہیں ہوئی۔
اس تقریب میں حجۃ الاسلام والمسلمین سید جلال حسینی نے آستان قدس رضوی کی مرکزی لائبریری کی خدمات اور سرگرمیوں کا تعارف کرایا۔
تقریب کے اختتام پر آرگنائزیشن آف لائبریریز،میوزیمز اور آستان قدس رضوی کے دستاویزاتی مرکز کے سربراہ نے آستان قدس رضوی کی مرکزی لائبریری کو یہ قیمتی مجموعہ عطیہ کرنے پر پاکستان سے تشریف لانے والے مشہور خطیب اور عالم دین علامہ سید شہنشاہ حسین نقوی کا شکریہ ادا کیا اور انہیں حرم مطہر کی جانب سے تحائف پیش کئے ۔ 
واضح رہے کہ آستان قدس رضوی کی مرکزی لائبریری ، غیرملکی کتب کے مطالعہ ہال سمیت دنیا کی مختلف زبانوں کے ماخذ کے مجموعے سے لیس ہو کر ، اہل علم و تحقیق بالخصوص حرم امام رضا(ع) کے غیرملکی زائرین کو خدمات فراہم کرتی ہے۔