چھٹی عالمی امام رضا(ع) کانگریس  مقالات اور علمی مواد کے ذریعہ شمولیت کی کال 

آستان نیوز کی رپورٹ کے مطابق؛ چھٹی عالمی امام رضا(ع) کانگریس   ’’امام رضا(ع) کی تعلیمات کو محور قرار دیتے ہوئے اہلبیت(ع) کی تہذیبی تعلیمات میں انسانی کرامت و حقوق‘‘ کے موضوع پر یکم اور دو جون کو مشہد مقدس میں منعقد کی جائے گی، اسی عالمی کانگریس کے سلسلے میں کانگریس کے ماہرین اور محققین کو تحقیق کا خلاصہ اور مقالہ ارسال کرنے کی کال دے دی گئی ہے ۔ 
یہ عالمی کانگریس جو کہ اہلبیت(ع) خصوصاً امام رضا(ع) کی حقوق اور انسانی کرامت سے متعلق تعلیمات کا جائزہ لینے اور عصری چیلنجز کے تناظر میں رضوی تعلیمات کی تہذیبی و علمی حیثیت کی از سرنو شناخت کرنے کے مقصد سے منعقد کی جا رہی ہے ۔ 
قابل ذکر ہے کہ یہ کانگریس آستان قدس رضوی کی علمی و ثقافتی آرگنائزیشن کی کاوشوں اور تہران یونیورسٹی کے تعاون سے منعقد کی جائے گی ، کانگریس میں مختلف موضوعات اور تمدنی نقطۂ نظر کے تحت انسان محوری، سماجی انصاف، اخلاقیات، فلسفہ اورطرز حکمرانی جیسے عناوین پر جامع بحث کی جائے گی اور رضوی تعلیمات کو علمی و فکری میدان میں انسانی بنیادی اقدار اور توازن کے ایک معتبر ماخذ کے طور پر پیش کرنے کی کوشش کی جائے گي ۔ 
محققین اور اساتذہ کرام اپنے مقالات کے خلاصہ(کم سے کم 1000 کلمات) کو دس مارچ2026 تک کانگریس کی آفیشل ویب سائٹ gcir.razavi.ir پر نام اندراج کرنے کے بعد اپلوڈ کر سکتے ہیں ، مقالات کے خلاصے پر مصنف یا مصنفین کا نام و نسب، ای میل ایڈریس اور رابطہ نمبر(ایتا اپلیکیشن والا) درج ہونا ضروری ہے اور مقالے کا مکمل متن 10 اپریل2026 تک جمع کرایا جا سکتا ہے تاہم حتمی قبولیت کا اعلان21اپریل2026 کوکیا جائے گا۔ 
کانگریس کے جاری کردہ منشور کے مطابق؛کانگریس کے تحقیقی موضوعات کو چھے بنیادی شعبوں منجملہ الہیاتی،فلسفی،سماجی، سیاسی،تہذیبی اور اخلاقی شعبوں میں تقسیم کیا گیا ہے تاکہ انسانی کرامت اور حقوق کے مفاہیم پر ایک کثیر الجہتی ،عملی اور جامع نقطہ نظر پیش کیا جا سکے۔ 
واضح رہے کہ یہ کانگریس رضوی تعلیمات اور معارف،اسلامی نقطہ نظر سے انسانی حقوق اور اہلبیت(ع) کی نظر میں تہذیبی فلسفہ کے میدان میں ایک نمایاں علمی کانگریس شمار ہوتی ہے جس کا سابقہ چار دہائیوں پر مشتمل ہے اور گذشتہ ادوار میں ملکی اور غیرملکی مفکرین اور دانشوروں کے ذریعہ اہم علمی و ثقافتی پیغامات پیش کئے جا چکے ہیں۔ 
قابل توجہ ہے کہ مصنفین کی رہنمائی، رجسٹریشن کی شرائط اور ریسرچ کال کی مکمل معلومات کانگریس کی آفیشل ویب سائٹ gcir.razavi.ir پر دستیاب ہیں ،تاہم کانگریس کے سیکریٹریٹ سے ای میل gcir@ut.ac.ir کے ذریعے رابطہ کر سکتے ہیں۔