امام رضا(ع) کی دعوت کو پورے وجود سے محسوس کیا

آستان نیوز کی رپورٹ کے مطابق؛ پاکستان کے ٹی وی اور سینما کی مشہور اداکارہ ضابط انور نے آستان قدس رضوی کے مرکزی میوزیم کا وزٹ کرنے کے دوران اظہار خیال کرتے ہوئے کہا کہ بہت سالوں سے میری یہ دلی خواہش تھی کہ حضرت امام علی بن موسیٰ الرضا علیہ السلام کی زیارت سے مشرف ہوں۔ 
انہوں نے مزید یہ بتایا کہ قانونی دستاویزات اور دیگر مسائل کے حوالے سے جو مشکلات میرے سامنے تھیں انہوں نے میرے لئے اس آرزو کو سخت اور دشوار بنا دیا تھا لیکن خدا کے فضل و کرم اور امام رضا(ع) کی خصوصی دعوت سے تمام سختیوں کے باجود زیارت سے مشرف ہوئی ہوں۔ 
گفتگو کو جاری رکھتے ہوئے کہا کہ میں اپنے احساسات کو لفظوں میں بیان نہیں کر سکتی ،ہر شخص کو ان قیمتی لمحات کو اپنے پورے وجود کے ساتھ محسوس کرنا چاہئے ،حرم کی روحانی فضا میں ایک خاص سکون ہے جو کسی دوسری جگہ نہیں مل سکتا۔ 
انہوں نے بتایا کہ اس سے پہلے میں مکہ اور مدینہ جیسے مقدس مقامات کی زیارت بھی کرچکی ہوں لیکن حرم امام رضا(ع) کی زیارت کا شرف پہلی بار نصیب ہوا ہے ۔ 
اس اہلسنت زائرہ کے مطابق جو کچھ انہوں نے اس سفر کے دوران تجربہ کیا وہ ایک مختلف اور روحانی کیفیت تھی جو انسان کو اندر سے بدل دیتی ہے ۔ 
آخر میں ان کا کہنا تھا کہ مجھے ایسا محسوس ہوتا ہے کہ مجھے بلایا گیا ہے نہ کہ میں خود آئی ہوں،گویا امام رضا(ع) چاہتے تھے کہ میں آؤں ،یہ لمحات میرے لئے ناقابل فراموش لمحات ہیں اور ہمیشہ میرے دل میں باقی رہیں گے۔