روضہ منورہ امام رضا(ع) کے خدام ، سوگوار زائرین کو کھانے اور رہائش کی خدمات فراہم کرنے کے لئے تیار ہیں

انہوں نے بتایا کہ کرامت رضوی فاؤنڈیشن اپنی تمام عوامی اور انتظامی صلاحیتوں کو بروئے کار لاتے ہوئے بیس ہزار زائرین کو رہائش اور روزانہ کی بنیاد پر دس لاکھ زائرین میں کھانا تقسیم کرے گی ۔ 
کرامت رضوی فاؤنڈیشن کے شعبہ سماجی خدمات کے ڈائریکٹر جناب رئیسیان زادہ نے آستان نیوز کو بتایا کہ کرامت رضوی فاؤنڈیشن مکمل تیاری کے ساتھ زائرین اور سوگواروں کی ان کے شایان شان میزبانی کے لئے میدان میں ہے تاکہ رہائش،کھانا اور دیگر سہولیات فراہم کر سکے۔ 
انہوں نے بتایا کہ مشہد مقدس میں خدمات فراہم کرنے کو دو حصوں میں تقسیم کیا گیا ہے پہلے حصے میں کرامت رضوی فاؤنڈیشن کی جانب سے تشییع جنازہ کے راستے پر قائم تقریبا 200 عوامی موکبوں کو مدد فراہم کرے گا جس میں چینی، چائے ،لیموں کا شربت، کیک اور دیگر ضروری اشیاء شامل ہیں ۔ 
انہوں نے کہا کہ دوسرے حصے میں حضرت امام رضا(ع) کے متبرک نام سے 30 موکب الوداعی پروگرام کے مقام ،تشیع جنازہ کے راستے اور حرم امام رضا(ع) کے اطراف میں قائم کئے گئے ہیں ، ان موکبوں کا ہدف  عزاداری کی جگہوں کا قیام، ناشتہ اور کھانا تقسیم کرنا اور زائرین کی پذیرائی ہے۔ 
 اس کے علاوہ تین مرکزی موکب تہ پل محلہ، شہید شوشتری اور مرکزی تنظیم  میں قائم ہیں جو انڈسٹریل باورچی خانے، کولڈ اسٹوریج اور بیکری جیسی سہولیات کو موکبوں کو فراہم کریں گے۔ 
انہوں نے بتایا کہ یہ مرکزی موکب روزانہ کی بنیاد پر دولاکھ روٹیاں تیار کرنے اور اسّی ہزار سے ایک لاکھ تک کھانا تیار کریں گے تاکہ خدمت کا سلسلہ بلا وقفہ جاری رہے ۔ 
کرامت رضوی فاؤنڈیشن کے شعبہ سماجی خدمات کے ڈائریکٹر نے تقریباً چار مقام پر ’’امام رضا(ع) سقا خانہ‘‘(سبیل) لگانے کی خبر دیتے ہوئے کہا کہ ان سقاخانوں میں عزاداروں کو پانی اور شربت فراہم کیا جائے گا۔
انہوں نے رہائش کے سلسلے میں وضاحت دیتے ہوئے کہا کہ زائر سرا، زائر شہر رضوی،باغ خاتون کیمپ،شہید شوشتری دارالکرامہ، امام رضا(ع) اسکول اور امام رضا(ع) یونیورسٹی میں زائرین کو رہائش فراہم کرنے کے تمام انتظامات مکمل کر لئے گئے ہیں ، مجموعی طور پر بیس ہزار زائرین کو ان جگہوں پر رہائش فراہم کی جائے گی۔ 
انہوں نے کہا کہ ان ایّام میں کرامت رضوی فاؤنڈیشن کی سرگرمیوں کا مرکزی محور بہتر انداز میں خدمات فراہم کرنا ہے اور امید کرتے ہیں کہ تمام خدام  اور عوامی کارکنوں کے باہمی اشتراک سے رہبرشہید کی تشییع جنازہ اور تدفین کے موقع پر سوگواروں اور زائرین کی بہترانداز میں خدمت کر سکیں۔