امام زمانہ (عج) کی امامت کے آغاز کے موقع پر ضریح مطہر امام رضا(ع) کی غبار روبی کی رسومات

آستان نیوز کی رپورٹ کے مطابق؛ نو ربیع الاوّل امام زمانہ(عج) کی امامت کے آغاز پر حضرت علی بن موسیٰ الرضا(ع) کی ضریح مطہر کی صفائی کے مراسم منعقد کئے گئے جن میں حضرت آیت اللہ العظمیٰ جعفر سبحانی، آیت اللہ فاضل لنکرانی، آستان قدس رضوی کے متولی آیت اللہ احمد مروی، ولی فقیہ کے نمائندہ آیت اللہ سید احمد علم الہدیٰ،صوبہ گلستان میں ولی فقیہ کے نمائندہ آیت اللہ نور مفیدی، اور ایران کے اعلی سول اور فوجی  حکام سمیت حرم امام رضا(ع) کے خدام  اور شہداء کے معززگھرانوں نے خصوصی شرکت  کی۔
روحانیت سے بھری فضا میں ان مراسم کا انعقاد کیا گیا جن میں خاندان عصمت و طہارت(ع) سے عقیدت کی خوشبو سے معطر فضا میں علمائے کرام اور  خدام  نے شرکت کی اور اہلبیت اطہار(ع) کے مداحوں نے اہلبیت(ع) کی شان میں اشعار پڑھے۔
ان مراسم کے دوران ضریح کے اندر موجود نذورات و عطیات کو بھی باہر نکالا گیا اورجنہیں مخصوص پیکنگ کے بعد آستان قدس رضوی کے خزانے میں منتقل کیا گیا۔
ان رسومات کے دوران مراجع عظام تقلید اور آستان قدس رضوی کے متولی نے ضریح مطہر کے اندر داخل ہو کر حضرت امام علی رضا(ع) کی قبر مطہر کے پتھرپر پڑے غلاف کو تبدیل کیا اور ضریح مطہر کے اندرونی حصوں کی صفائی کی، نیز ضریح مطہر کے اندرونی حصوں کو خالص گلاب سے بھی دھویا گیا۔
واضح رہے کہ صفائی کے مراسم کے دوران قرآن کریم کی تلاوت، زیارت جامعہ کبیرہ اور زیارت امین اللہ بھی پڑھی گئی ۔