امام رضا(ع) انٹرنیشنل یونیورسٹی میں غیرملکی طلبا کو داخلہ دینے کی صلاحیت موجودہ حد سے کئی گنا زیادہ ہے

آستان نیوز کی رپورٹ کے مطابق؛ سپریم کونسل آف کلچرل ریوولوش کے ورکنگ گروپ کے سیکریٹری ڈاکٹر بالایی نے امام رضا(ع) انٹرنیشنل یونیورسٹی کے شعبہ بین الاقوامی امور کا دورہ کیا اور شعبے کی منظم اور دقیقی کارکردگی کو سراہتے ہوئے غیرملکی طلبا کے داخلے کے حوالے سے یونیورسٹی کے معیارات کی تعریف کی ۔
انہوں نے یونیورسٹی کی بین الاقوامی سرگرمیوں میں تنوع کا ذکر کرتے ہوئے کہا کہ امام رضا (ع) انٹرنیشنل یونیورسٹی میں موجود معیارات یہ ظاہر کرتے ہیں کہ اس یونیورسٹی میں غیر ملکی طلبا کے داخلے کی صلاحیت موجودہ مقررہ حد سے بھی زیادہ ہے، اور اگر قانونی مراحل طے کر کے وزارت علوم، تحقیقات و ٹیکنالوجی سے ضروری اجازت حاصل کر لی جائے تو یہ صلاحیت بڑھائی جا سکتی ہے۔
اس نشست کے آغاز میں، امام رضا (ع) بین الاقوامی یونیورسٹی کے شعبہ بین الاقوامی امور کے ڈائریکٹر ڈاکٹر ابراہیم داودی نے اس شعبے کے فرائض، پروگراموں اور مشن کے بارے میں ایک رپورٹ پیش کی۔ انہوں نے بتایا کہ وزارت علوم، تحقیق و ٹیکنالوجی کے مشن کے ساتھ ساتھ، آستان قدس رضوی نے بھی یونیورسٹی کے بین الاقوامی شعبے کے لیے مخصوص پروگرام ترتیب دیے ہیں۔ یونیورسٹی علمی سفارت کاری کے نقطہ نظر سے ان پروگراموں کو تعلیمی انداز میں آگے بڑھانے کی کوشش کر رہی ہے۔
انہوں نے بتایا کہ یونیورسٹی کے پاس غیرملکی طلبا کی تعلیمی پروگراموں کے علاوہ دیگر علمی اور بین الاقوامی سرگرمیوں کا بھی ایجنڈا ہے ،جن میں اربعین سے متعلق علمی پروگرام، مقدس عتبات عالیات کی یونیورسٹیوں کے ساتھ مشترکہ کانفرنسوں کا انعقاد اور سمجھوتوں پر دستخط کرنا شامل ہے۔
ڈاکٹر داوودی نے شعبہ بین الاقوامی امور کے مختلف حصوں کا تعارف کراتے ہوئے پروگراموں اور سرگرمیوں کی رپورٹ بھی پیش کی اور فارسی زبان کی تعلیم، بین الاقوامی طلبہ کے داخلے اور قونصلر امور کے شعبے میں یونیورسٹی کی صلاحیتوں پر زور دیا۔
رضوی تعلیمات و معارف کی ترویج کے ساتھ ساتھ فارسی زبان کی سفارت کاری کو فروغ
یونیورسٹی کے شعبہ فارسی زبان کی ڈائریکٹر محترمہ فاطمہ رجبی نے اس شعبے کے پروگراموں کی رپورٹ پیش کی اور وسط ایشائی ممالک میں فارسی زبان کی سفارت کی توسیع کو اس ادارے کی اہم سرگرمیوں سے ایک قرار دیا۔
انہوں نے فارسی زبان کی تعلیم کے تحقیقی و ترقیاتی ڈھانچے کا ذکر کرتے ہوئے کہا کہ رضوی علوم  پر مبنی فارسی زبان سیکھنے کے لیے درسی کتابوں کی تیاری اس شعبے کے اہم پروگراموں میں شامل ہے، جس پر کام جاری ہے۔ انہوں نے مزیدکہا کہ طلبا کی ضرورت کے مطابق مختلف یونیورسٹیوں کے لیے فارسی زبان کے کورسز آن لائن اور کلاس رومز دونوں صورتوں میں دستیاب ہیں۔
جناب رجبی نے یونیورسٹی کے شعبہ فارسی زبان اور سعدی فاؤنڈیشن کے ساتھ مسلسل رابطے کو اس شعبے کی اہم صلاحیتوں میں قرار دیتے ہوئے کہا کہ سعدی فاؤنڈیشن کے تعاون سے اساتذہ کی صلاحیت سازی کے کورسز بھی سالانہ منعقد کیے جاتے ہیں اور شرکت کرنے والے اساتذہ فارسی زبان کی تعلیم کے جدید طریقوں اور علم سے آشنا ہوتے ہیں۔
غیرملکی طلبا کے داخلے سے متعلق چینلجز
یونیورسٹی میں غیرملکی طلباء کو جذب اور داخلہ دینے والے شعبے کے انچارج محترم شایانی فر نے غیرملکی طلبا کے اعداد و شمار اور انہیں داخلہ دینے کے راستے میں موجود رکاوٹوں سے متعلق ایک رپورٹ پیش کی۔
انہوں نے غیرملکی طلبا کے لئے ویزا کے اجراء کو ایک اہم مسئلہ قرار دیتے ہوئے کہا کہ بعض انتظامی مراحل میں تاخیر کی وجہ سے طلبا کے یونیورسٹی چھوڑنے کا خدشہ رہتا ہے ۔
غیرملکی طلبا کے قونصلر امور کا جائزہ
یونیورسٹی کے قونصلر امور کے انچارج جناب نخعی نے طلبہ کے لئے قونصلر خدمات کے حوالے سے موجودہ مسائل بیان کیے اور طلبہ کے ویزا کے اجراء میں تاخیر اور امیگریشن   سے متعلق کچھ مسائل کی طرف اشارہ کیا۔
واضح رہے کہ دورے کے اختتام پر حاضرین نے یونیورسٹی کے بین الاقوامی امور کے مختلف شعبوں کا دورہ کیا اور غیرملکی طلبا سے متعلق سرگرمیوں اور طریقہ کار کا قریب سے مشاہدہ کیا۔