اسپیشل اکنامک زون سرخس ،ایران کے ٹرانزٹ ہب میں تبدیل ہونے کی راہ پر گامزن

آستان نیوز کی رپورٹ کے مطابق؛ جناب محمد رضا رجبی مقدم نے اپنے معاونین کے ہمراہ پروڈکشن لائن اور لاجسٹک شعبہ جات کا دورہ کیا اور اس دوران صنعتی یونٹوں اور بنیادی ڈھانچے کے جاری منصوبوں کا بھی جائزہ لیا۔ 
انہوں نے پروڈکشن لائن کے کارکنوں اور مزدوروں سے گفتگو کرتے ہوئے کہا کہ سردیوں کے موسم کی وجہ سے پیداواری سائیکل میں رکاوٹ نہیں بننی چاہئے اور تمام اداروں پر لازم ہے کہ وہ پوری صلاحیتوں کو بروئے کار لاتے ہوئے سرخس شہر کی اقتصادی ترقی کو جاری رکھیں۔ 
انہوں نے مزید یہ کہا کہ پیداوار میں اضافہ،پائیدار روزگار کی فراہمی اور علاقائی اقتصادی خوشحالی کا انحصار صنعتی یونٹوں کی سرگرمیوں اور بنیادی ڈھانچوں کے منصوبوں کی بیک وقت پیش رفت پر ہے ۔
انہوں نے ریلوے لاجسٹک فیز کے دورے کے دوران اس شعبے میں انجام دیئے گئے اقدامات کو ملکی سطح پر منفرد اور غیرمعمولی قرار دیتے ہوئے کہا کہ گذشتہ سال ملک کے ریلوے ٹرانزٹ کا تقریبا پچاسی فیصد سرخس بارڈر سے ہوا تھا ،اس لئے پرائیویٹ ریلوے سائٹس کو فوری طور پر فعال کرنا اور موجودہ خامیوں کو دور کرنا ایک اسٹریٹجک ضرورت ہے ۔ 
انہوں نے یہ بھی بتایا کہ انٹرنیشنل سرخس لاجسٹک پارک منصوبہ جو کہ آستان قدس رضوی اور چینی کمپنی کی مشارکت سے تکمیل کے مراحل میں ہے اس میں بھاری کنٹینرز کو اتارنے اور لوڈ کرنے صلاحیت رکھنے والی ہیوی کرینیں نصب کی جاری ہیں۔
طے شدہ شیڈول کے مطابق جنوری کے اختتام تک چین سے پہلا کنٹینز سرخس کے راستے سے یورپ جانے والی مشرقی۔مغربی راہداری کے حصے کے طور پر ملک میں داخل ہو گا۔ 
آخر میں جناب رجبی مقدم کا کہنا تھا کہ لاجسٹک انفراسٹرکچر کی ترقی،پیداواری صلاحیتوں کے استحکام اور اندرونی و بیرونی سرمایہ کاروں اور انتظامی اداروں کے مابین ہم آہنگی سے سرخس زون ملکی سطح پر فیصلہ کن کردار ادا کرے گا۔